ਬੰਨ੍ ਲਿਆ ਸਿਹਰਾ,
ਸਜ ਗਿਆ ਲਹਿੰਗਾ |
ਵੱਡੇ ਸਾਰੇ ਪੈਲੇਸ ਵਿੱਚ,
ਵਿਆਹ ਹੋਇਆ ਮਹਿੰਗਾ |
ਥੋੜ੍ਹੇ ਜੇ ਸਮੇਂ ਤੋਂ ਬਾਅਦ,
ਘੇਰ ਲਿਆ ਵਿਚੋਲਾ ਸੀ |
ਦੱਸ ਕਿਹੜੀ ਗੱਲੋਂ ਸਾਥੋਂ,
ਰੱਖ ਲਿਆ ਓਹਲਾ ਸੀ |
ਦੋਵੇਂ ਹੀ ਧਿਰਾਂ ਦੇ ਜੀ ,
ਵਿਚਾਰ ਸੀ ਬੜੇ ਵੱਖਰੇ |
ਕਹਿੰਦੇ ਸੀ ਵਿਚੋਲੇ ਨੂੰ ,
ਬੰਦੇ ਚੰਗੇ ਨਹੀਓ ਟੱਕਰੇ |
ਸੁਣ ਕੇ ਗੱਲ ਉਹਨਾਂ ਦੀ,
ਵਿਚੋਲਾ ਸੀ ਬੜਾ ਹੱਸਿਆ |
ਕੱਲੀ-ਕੱਲੀ ਗੱਲ ਨੂੰ ਜੀ ,
ਫਿਰ ਉਹਨੇ ਇੰਝ ਦੱਸਿਆ|
ਕੁੜੀ ਵਾਲਿਆਂ ਦੀ ਮੰਗ ਸੀ,
ਜ਼ਮੀਨ,ਕੋਠੀ ਤੇ ਕਾਰ ਹੋਵੇ |
ਸਰਕਾਰੀ ਨੌਕਰੀ ਤੇ ਲੱਗਾ,
ਜਾਂ ਕੈਨੇਡਾ ਦਾ ਪੀ.ਆਰ ਹੋਵੇ |
ਮੁੰਡੇ ਵਾਲਿਆਂ ਨੇ ਵੀ ਭਾਈ,
ਮੈਨੂੰ ਇਹੀ ਕੁਝ ਕਿਹਾ ਸੀ |
ਗੱਡੀ, ਗਹਿਣੇ ਅਤੇ ਕੈਸ਼ ,
ਵੱਡੇ ਪੈਲੇਸ ‘ਚ ਵਿਆਹ ਸੀ |
ਮੰਗਾਂ ਮੰਨ ਲਈਆਂ ਸਾਰੀਆਂ,
ਦੱਸੋ ਕੀ ਬਾਕੀ ਰਿਹਾ ਸੀ |
ਬਸ ਬੰਦੇ ਚੰਗੇ ਹੋਣ ਭਾਈ ,
ਤੁਸੀਂ ਇਹ ਤਾਂ ਨੀ ਕਿਹਾ ਸੀ |
ਚੁਣੇ ਜਿਹਨਾਂ ਨੇ ਵੀ ਭਾਈ ,
ਗੁਣਾਂ ਵਾਲੇ ਰਾਹ ਹੋਣਗੇ |
‘ਚਾਹਲ’ ਉਹਨਾਂ ਰੂਹਾਂ ਦੇ ,
ਸੰਪੂਰਨ ਵਿਆਹ ਹੋਣਗੇ |
ਜਸਵਿੰਦਰ ਚਾਹਲ
9876915035
