ਜੈ ਜਵਾਨ ਜੈ ਕਿਸਾਨ ਵਾਲਾ ਨਾਅਰਾ ਜੀ ,
ਸੱਚੀਂ ਲੱਗਦਾ ਹੈ ਬੜਾ ਹੀ ਪਿਆਰਾ ਜੀ |
ਸੁਣੋ ਤੁਸੀਂ ਮੇਰੀ ਕਲਮ ਦੀ ਜ਼ੁਬਾਨੀ ਜੀ ,
ਫੌਜੀ ਜਵਾਨ ਦੀ ਕੀ ਹੁੰਦੀ ਕਹਾਣੀ ਜੀ |
ਭਰਤੀ ਹੋਣ ਦਾ ਖਿਆਲ ਜਦੋਂ ਆਉਂਦਾ ਹੈ,
ਕਸਰਤਾਂ ਕਰਕੇ ਫਿਰ ਸਰੀਰ ਕਮਾਉਂਦਾ ਹੈ |
ਲੰਬੀ ਛਾਲ,ਉੱਚੀ ਛਾਲ ਤੇ ਭਾਜ ਵਾਲੀ ਮੱਲ,
ਭਰਤੀ ਹੋਣਾ ਕਿਹੜਾ ਹੁੰਦੀ ਆ ਸੌਖੀ ਗੱਲ |
ਹਰ ਟੈਸਟ ਵਾਲੀ ਜਦੋਂ ਜਾਂਦਾ ਪੀਂਘ ਝੂਟ,
ਫਿਰ ਜਾ ਕੇ ਬਣਦਾ ਏ ਜੀ ਕਿਤੇ ਰੰਗਰੂਟ |
ਛੱਡਣਾ ਪੈਂਦਾ ਹੈ ਫਿਰ ਪਿੰਡ ਤੇ ਘਰ -ਬਾਰ,
ਪੂਰੇ ਪਰਿਵਾਰ ਵਾਲਾ ਮੋਹ ਤੇ ਪਿਆਰ |
ਦੂਰ ਦੁਰਾਡੇ ਫਿਰ ਲੱਗਦੇ ਨੇ ਡੇਰੇ ਜੀ ,
ਸਾਲ ਛਿਮਾਹੀ ਤੋਂ ਹੀ ਵੱਜਦੇ ਨੇ ਗੇੜੇ ਜੀ |
ਆਉਂਦੀ ਆ ਲੋਹੜੀ ਤੇ ਆਉਂਦੀ ਆ ਦੀਵਾਲੀ,
ਉਹਦੇ ਬਿਨਾਂ ਘਰ ਤਾਂ ਲੱਗਦਾ ਹੈ ਖਾਲੀ-ਖਾਲੀ |
ਉਦਾਸ ਹੋ ਜਾਂਦੀ ਆ ਵੀਣੀ ਵਾਲੀ ਵੰਗ ਜੀ,
ਫਿੱਕੇ ਜਿਹੇ ਰਹਿ ਜਾਂਦੇ ਹੋਲੀ ਦੇ ਰੰਗ ਜੀ |
ਦਿਲ ਵਿੱਚ ਉਸ ਵੇਲੇ ਹੌਲ ਜਿਹੇ ਪੈਂਦੇ ਨੇ,
ਪਾਪਾ ਕਦੋਂ ਆਊ? ਜਦੋਂ ਬੱਚੇ ਕਹਿੰਦੇ ਨੇ |
ਕਦੇ ਮਾਰੂਥਲ ਦੀ ਤਿੱਖੀ ਧੁੱਪ ਵਿੱਚ ਸੜਦੇ ,
ਕਦੇ ਬਰਫੀਲੀਆਂ ਚੋਟੀਆਂ ‘ਤੇ ਜਾ ਖੜ੍ਹਦੇ |
ਫੁੱਲ ਰੱਖ ਦੇਣਾ ਉੱਤੇ ਕੰਡਿਆਂ ਦੀ ਸੇਜ ਦੇ,
ਕਿੰਨੇ ਹੌਂਸਲੇ ਨਾਲ ਹੋਣੇ ਜੰਗ ਵਿੱਚ ਭੇਜਦੇ |
“ਜੀ ਸਰ” ਕਹਿਣਾ ਨਾ ਹੋਣਾ ਇਨਕਾਰੀ ਜੀ,
ਅਨੁਸਾਸ਼ਨ ‘ਚ ਰਹਿ ਕੇ ਜ਼ਿੰਦਗੀ ਗੁਜ਼ਾਰੀ ਜੀ |
ਜਿਵੇਂ ਛਿਪਦਾ ਏ ਸੂਰਜ ਤੇ ਚੜ੍ਹਦਾ ਏ ਚੰਦ ,
ਫੌਜੀ ਵੀ ਹੁੰਦੇ ਆ ਉਵੇਂ ਹੀ ਸਮੇਂ ਦੇ ਪਾਬੰਦ |
ਕੁਦਰਤੀ ਆਫ਼ਤ ਹੜ੍ਹ, ਤੂਫ਼ਾਨ ਤੇ ਭੁਚਾਲ,
ਹਰ ਥਾਂ ‘ਤੇ ਖੜ੍ਹਦੇ ਨੇ ਇਹ ਮਾਈ ਦੇ ਲਾਲ |
ਆਹ ਕਈ ਮੇਰੇ ਵੀਰ ਫ਼ਿਕਰੇ ਜੇ ਕੱਸਦੇ ,
ਕਰਕੇ ਗੱਲ ਫੌਜੀ ਦੀ ਬੜਾ ਹੀ ਹੱਸਦੇ |
ਜੇ ਫੌਜੀ ਬਾਰਡਰ ‘ਤੇ ਹਿੱਕਾਂ ਨਾ ਤਾਣਦੇ,
ਕਿਵੇਂ ਓਏ ਤੁਸੀਂ ਨੀਦਾਂ ਗੂੜ੍ਹੀਆਂ ਮਾਣਦੇ |
ਬਸ ਇੰਨੀ ਕੁ ਗੱਲ ਤੁਸੀਂ ਸਮਝਿਓ ਵੀਰੋ,
ਫੌਜੀ ਜਵਾਨ ਹੀ ਨੇ ਸਾਡੇ ਅਸਲੀ ਹੀਰੋ |
ਸੌਖੇ ਨਹੀਂਓ ਹੁੰਦੇ ਪੀਣੇ ਸ਼ਹੀਦੀ ਵਾਲੇ ਜਾਮ,
ਜੰਗ ਵਿੱਚ ਜਾਣ ਵਾਲੇ ਹੁੰਦੇ ਨਹੀਂਓ ਆਮ |
ਦਿਲ ਵਿੱਚ ਲੈਕੇ ਜਜ਼ਬਾ ਦੇਸ਼ ਪਿਆਰ ਦਾ,
ਫੌਜੀ ਵੀਰਾਂ ਨੂੰ ‘ਚਾਹਲ’ ਸਲੂਟ ਮਾਰਦਾ |
ਜਸਵਿੰਦਰ ਚਾਹਲ
9876915035
