ਬੰਬੀਹਾ ਕੁਦਰਤ ਦਾ ਇੱਕ ਅਨਮੋਲ ਪੰਛੀ ਜਿਹੜਾ ਸਵੈ-ਮਾਣ ਅਤੇ ਸਵੈ-ਬਲੀਦਾਨ ਦਾ ਪ੍ਰਤੀਕ ਹੈ | ਪਰ ਅਸੀਂ ਇਸ ਨੂੰ ਕਿਹੜੇ ਅਰਥਾਂ ਵਿੱਚ ਗ੍ਰਹਿਣ ਕਰ ਰਹੇ ਹਾਂ? ਗੁਰਬਾਣੀ ਵਿੱਚ ਉਸਦਾ ਜ਼ਿਕਰ ਪਰਮਸ਼ਕਤੀ ਵਿੱਚ ਅਭੇਦ ਇਕਮਿਕ ਹੋ ਜਾਣ ਵਜੋਂ ਸਾਹਮਣੇ ਆਉਂਦਾ ਹੈ | ਇਤਿਹਾਸ, ਮਿਥਿਹਾਸ, ਸਾਹਿਤ ਅੰਦਰੋਂ ਇਸ ਬੰਬੀਹੇ ਨੂੰ ਕੱਢ ਕੇ ਅਜੋਕੇ ਸਮੇਂ ਅੰਦਰ ਆਪਣੇ ਆਪ ਨੂੰ ਇਨਸਾਨ ਕਹਿਣ ਵਾਲਿਆਂ ਨੇ ਜਿਸ ਤਰਾਂ ਬੰਬੀਹੇ ਨੂੰ ਪਰਿਭਾਸ਼ਿਤ ਕੀਤਾ ਹੈ , ਉਹ ਬੇਹੱਦ ਚਿੰਤਾਜਨਕ ਹੈ | ਬਦਲਾਅ ਕੁਦਰਤ ਦਾ ਨਿਯਮ ਹੈ , ਪਰ ਬੰਬੀਹੇ ਵਿਚਲਾ ਇਹ ਬਦਲਾਅ ਖ਼ਤਰਨਾਕ ਹੈ |
ਸਾਡੇ ਮਾਲਕ ਦਾ ਬੰਬੀਹਾ ਆਪਣੀ ਜਾਨ ਦੀ ਕੁਰਬਾਨੀ ਦੇਣ ਲਈ ਤਤਪਰ ਹੈ | ਪਰ ਇਹਨਾਂ ਦਾ ਬੰਬੀਹਾ ਆਮ ਲੋਕਾਂ ਨੂੰ ਡਰਾਉਣ ਵਾਲਾ, ਹੱਡ ਪੋਲੇ ਕਰਨ ਵਾਲਾ ਅਤੇ ਤੂਤ ਦੇ ਉਹਲੇ ਕਤਲ ਕਰਨ ਵਾਲਾ ਹੈ | ਜੱਟਾਂ ਤੇ ਜਵਾਨੀ ਤਾਂ ਪਹਿਲਾਂ ਵੀ ਚੜ੍ਹਦੀ ਸੀ , ਦੇਸ਼ ਦੀ ਖ਼ਾਤਿਰ ਜਾਨ ਕੁਰਬਾਨ ਕਰਨ ਵਾਲੀ ਜਵਾਨੀ, ਨਿਆਸਰਿਆਂ ਨੂੰ ਆਸਰਾ ਦੇਣ ਵਾਲੀ ਜਵਾਨੀ , ਆਪਣਾ ਸਰਬੰਸ ਕੌਮ ਤੋਂ ਕੁਰਬਾਨ ਕਰਨ ਵਾਲੀ ਜਵਾਨੀ | ਪਰ ਕੀ ਹੁਣ ਲੋਕਾਂ ਨੂੰ ਡਰਾਉਣਾ ਅਤੇ ਮੁੱਛਾਂ ਦਾ ਤਾਅ ਦਿਖਾਉਣਾ ਹੀ ਜਵਾਨੀ ਹੈ ?
ਫੈਸਲਾ ਤੁਸੀਂ ਕਰਨਾ ਹੈ ਕਿ ਤੁਸੀਂ ਆਪਣੀਆਂ ਅਗਲੀਆਂ ਪੀੜ੍ਹੀਆਂ ਨੂੰ ਕਿਸ ਬੰਬੀਹੇ ਨਾਲ ਜੋੜਨਾ ਹੈ |
ਮੈਂ ਬੰਬੀਹਾ ਬੋਲਦਾ……
ਬਿਨਾਂ ਸੋਚੇ ਸਮਝੇ ਕਦੇ ਵੀ ,
ਹਾਂ ‘ਚ ਹਾਂ ਨਹੀਂ ਮਿਲਾਈ ਦੀ |
ਭੈਣ-ਭਰਾਵਾਂ ਨੂੰ ਕੁਰਾਹੇ ਪਾ ਕੇ,
ਰੋਟੀ ਨਹੀਂਓ ਖਾਈਦੀ |
ਪਿਸਤੌਲ ਬੰਦੂਕਾਂ ਚਲਾ ਕੇ ,
ਜਿਹੜਾ ਲਹੂ ਤੁਸੀਂ ਡੋਲ੍ਹਿਆ |
ਮੈਂ ਬੰਬੀਹਾ ਬੋਲਦਾ ਜ਼ਰੂਰ ,
ਪਰ ਕਦੇ ਇੱਦਾਂ ਨਹੀਂਓ ਬੋਲਿਆ |
ਇਹ ਚੇਤਿਆਂ ‘ਚ ਨੀ ਰਹਿਣਾ ,
ਕਿ ਕਿੰਨੇ ਕੁ ਪੈਸੇ ਕਮਾਏ ਨੇ |
ਇਹ ਚੇਤੇ ਰੱਖਿਆ ਜ਼ਰੂਰ ਜਾਊ,
ਕਲਮ ਨੇ ਰਾਹ ਕਿਹੜੇ ਪਾਏ ਨੇ |
ਮਾਂ ਨੂੰ ਪੁੱਛਿਓ ਜ਼ਰੂਰ ਜਾ ਕੇ ,
ਜੀਹਦਾ ਪੁੱਤ ਤੁਸੀਂ ਖੋਹ ਲਿਆ |
ਮੈਂ ਬੰਬੀਹਾ ਬੋਲਦਾ ਜ਼ਰੂਰ ,
ਪਰ ਕਦੇ ਇੱਦਾਂ ਨਹੀਂਓ ਬੋਲਿਆ |
ਅੰਬਰੀਂ ਚੜ੍ਹਨ ਲਈ ਤੁਸੀਂ ,
ਜਿਹੜੀ ਪੌੜੀ ਲਾ ਛੱਡੀ ਆ |
ਥੱਲੇ ਨਜ਼ਰ ਮਾਰ ਦੇਖਿਓ ,
ਵਿਰਸੇ ਦੀ ਹਿੱਕ ਵਿੱਚ ਗੱਡੀ ਆ |
ਤਬਾਹੀ ਦਾ ਸਿਰਨਾਵਾਂ ਓਏ ,
ਜਿਹੜਾ ਰਾਹ ਤੁਸੀਂ ਟੋਲਿਆ,
ਮੈਂ ਬੰਬੀਹਾ ਬੋਲਦਾ ਜ਼ਰੂਰ ,
ਪਰ ਕਦੇ ਇੱਦਾਂ ਨਹੀਂਓ ਬੋਲਿਆ |
ਮੋਹਰੀ ਹੋਵੋਗੇ ਜ਼ਰੂਰ ਤੁਸੀਂ
ਲਾਇਕ ਤੇ ਵਿਊ ਵਧਾਉਣ ‘ਚ
ਪਰ ਬਹੁਤ ਫਰਕ ਹੁੰਦਾ ਸੋਹਣਿਓ ,
ਸ਼ੌਹਰਤ ਤੇ ਨਾਮ ਕਮਾਉਣ ‘ਚ|
‘ਚਾਹਲ’ ਨੇ ਕਲਮ ਨੂੰ ਕਦੇ ਵੀ ,
ਸ਼ੌਹਰਤ ਦੇ ਪੱਲੜੇ ‘ਚ ਨੀ ਤੋਲਿਆ |
ਮੈਂ ਬੰਬੀਹਾ ਬੋਲਦਾ ਜ਼ਰੂਰ ,
ਪਰ ਕਦੇ ਇੱਦਾਂ ਨਹੀਂਓ ਬੋਲਿਆ |
ਜਸਵਿੰਦਰ ਚਾਹਲ 9876915035
