ਅਲ਼ਫਾਜ਼ ਤੇ ਆਵਾਜ਼ ਦਾ ਸੁਮੇਲ ਜਸਵਿੰਦਰ ਚਾਹਲ-:BIOGRAPHY AND POETRY

ਜਸਵਿੰਦਰ ਸਿੰਘ ਚਾਹਲ ਦਾ ਜਨਮ ਪਿੰਡ ਕੋਟ ਲੱਲੂ (ਲੱਲੂਆਣਾ) ਜ਼ਿਲ੍ਹਾ ਮਾਨਸਾ (ਪੰਜਾਬ)  ਵਿਖੇ ਪਿਤਾ ਸ੍ਰ. ਮਿੱਠੂ ਸਿੰਘ ਦੇ ਘਰ ਮਾਤਾ ਅੰਗਰੇਜ਼ ਕੌਰ ਦੀ ਕੱਖੋਂ 10 ਅਕਤੂਬਰ 1978 ਵਿੱਚ ਹੋਇਆ। ਪਿੰਡ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ ਦੀ ਕੱਚੀ ਪਹਿਲੀ ਜਮਾਤ ਤੋਂ ਵਿੱਦਿਆ ਸ਼ੁਰੂ ਕਰਕੇ ਪੰਜਵੀਂ ਜਮਾਤ ਪਾਸ ਕੀਤੀ। ਦਸਵੀਂ ਜਮਾਤ ਖਾਲਸਾ ਹਾਈ ਸਕੂਲ ਮਾਨਸਾ ਅਤੇ 10+2 ਗਾਂਧੀ ਸੀਨੀਅਰ ਸੈਕੰਡਰੀ ਸਕੂਲ ਮਾਨਸਾ ਤੋਂ ਪਾਸ ਕੀਤੀ। ਬੀ.ਏ. ਦੀ ਡਿਗਰੀ ਸਰਕਾਰੀ ਨਹਿਰੂ ਮੈਮੋਰੀਅਲ ਕਾਲਜ ਮਾਨਸਾ ਤੋਂ ਪਾਸ ਕੀਤੀ।  ਬੀ.ਅੈੱਡ. ਸਰਕਾਰੀ ਕਾਲਜ ਆਫ ਐਜੂਕੇਸ਼ਨ ਜਲੰਧਰ ਤੋਂ ਕੀਤੀ। ਐੱਮ.ਏ. (ਪੰਜਾਬੀ) ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਪਾਸ ਕੀਤੀ। ਸਭ ਤੋਂ ਪਹਿਲਾਂ ਜਵਾਹਰ ਨਵੋਦਿਆ ਵਿਦਿਆਲਿਆ ਫ਼ਫੜੇ ਭਾਈ ਕੇ (ਮਾਨਸਾ) ਤੋਂ ਅਧਿਆਪਕ ਵਜੋਂ ਆਪਣੀ ਨੌਕਰੀ ਸ਼ੁਰੂ ਕੀਤੀ। ਫਿਰ ਕੁਝ ਸਮਾਂ ਜਵਾਹਰ ਨਵੋਦਿਆ ਵਿਦਿਆਲਿਆ ਕਾਨਪੁਰ ਦੇਹਾਤ (ਉੱਤਰ ਪ੍ਰਦੇਸ਼) ਵਿਖੇ ਅਧਿਆਪਕ ਵਜੋਂ ਸੇਵਾਵਾਂ ਦਿੱਤੀਆਂ। ਫੇਰ ਕੇਂਦਰੀ ਵਿਦਿਆਲਿਆ ਏਅਰ ਫੋ਼ਰਸ ਸਟੇਸ਼ਨ (ਬਰਨਾਲਾ) ਵਿਖੇ ਅਧਿਆਪਕ ਵਜੋਂ ਸੇਵਾਵਾਂ ਨਿਭਾਈਆਂ। ਉਸ ਤੋਂ ਬਾਅਦ ਸ੍ਰ. ਚੇਤਨ ਸਿੰਘ ਸਰਵਹਿੱਤਕਾਰੀ ਵਿੱਦਿਆ ਮੰਦਰ (ਮਾਨਸਾ) ਵਿਖੇ ਅਧਿਆਪਕ ਵਜੋਂ ਸੇਵਾਵਾਂ ਨਿਭਾਈਆਂ। ਹੁਣ 2008 ਤੋਂ ਲਗਾਤਾਰ ਸਰਕਾਰੀ ਐਲੀਮੈਂਟਰੀ ਸਕੂਲ ਘੁੰਮਣ ਕਲਾਂ (ਬਠਿੰਡਾ) ਵਿੱਚ ਆਪਣੀਆਂ ਸੇਵਾਵਾਂ ਨਿਭਾ ਰਹੇ ਹਨ।ਜਸਵਿੰਦਰ ਚਾਹਲ ਦਾ ਵਿਆਹ ਸਿੰਬਲਜੀਤ ਕੌਰ ਨਾਲ ਹੋਇਆ ਉਹ ਵੀ ਅਧਿਆਪਕਾ ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ ਇਹਨਾਂ ਦੇ ਘਰ ਇੱਕ ਪੁੱਤਰ ਸਤਿੰਦਰਜੀਤ ਸਿੰਘ ਨੇ ਜਨਮ ਲਿਆ। ਲਿਖਣ ਪੜੵਨ ਦਾ ਸ਼ੌਕ ਸ਼ੁਰੂ ਤੋਂ ਹੀ ਰਿਹਾ ।  ਪੰਜਾਬੀ ਟ੍ਰਿਬਿਊਨ ਅਖ਼ਬਾਰ ਵਿੱਚ ਹਰ ਐਤਵਾਰ ਇੱਕ ਫ਼ੋਟੋ ਕੈਪਸ਼ਨ ਮੁਕਾਬਲਾ ਚੱਲਦਾ ਸੀ ਸ਼ੁਰੂ ਵਿੱਚ ਉਹਦੇ ਲਈ ਲਿਖਣਾ ਸ਼ੁਰੂ ਕੀਤਾ  ਉਸ ਮੁਕਾਬਲੇ ਵਿੱਚ ਜਸਵਿੰਦਰ ਚਾਹਲ ਨੇ 25 ਵਾਰ ਪਹਿਲਾ ਸਥਾਨ ਪ੍ਰਾਪਤ ਕੀਤਾ 23 ਵਾਰ ਦੂਸਰਾ ਸਥਾਨ ਪ੍ਰਾਪਤ ਕੀਤਾ 18 ਵਾਰ ਤੀਸਰਾ ਸਥਾਨ ਪ੍ਰਾਪਤ ਕੀਤਾ। ਇੰਨੇ ਇਨਾਮ ਜਿੱਤਣ ਕਰਕੇ ਉਸਨੂੰ ਕੈਪਸ਼ਨਾਂ ਵਾਲਾ ਚਾਹਲ ਹੀ ਕਹਿਣ ਲੱਗ ਪਵੇ। ਚਾਹਲ ਦੀਆਂ ਲਿਖੀਆਂ ਕਵਿਤਾਵਾਂ, ਮਿੰਨੀ ਕਹਾਣੀਆਂ, ਆਰਟੀਕਲ, ਪੰਜਾਬੀ ਟ੍ਰਿਬਿਊਨ, ਅਜੀਤ, ਜੱਗਬਾਣੀ, ਸਪੋਕਸਮੈਨ, ਨਵਾਂ ਜ਼ਮਾਨਾ ਲਗਭਗ ਸਾਰੇ ਅਖ਼ਬਾਰਾਂ ਅਤੇ ਪੰਜਾਬੀ ਦੇ ਬਹੁਤ ਸਾਰੇ ਰਸਾਲਿਆਂ ਚ ਛਪੇ ਹਨ। ਚਾਹਲ ਦੀ ਕਲਮ ਚੋਂ ਰਚੀ ਗਈ ਕਵਿਤਾ ‘ ਇੱਕ ਮਰਦਮਸ਼ੁਮਾਰੀ ਇਹ ਵੀ’ ਪੂਰੇ ਵਰਲਡ ਵਿੱਚ ਪ੍ਰਸਿੱਧ ਹੋਈ।ਵਰਲਡ ਪੰਜਾਬੀ ਫਾਊਂਡੇਸ਼ਨ ਅਤੇ ਅਮਰ ਅਾਡਿਓ ਵੱਲੋਂ ਉਸ ਕਵਿਤਾ ਉੱਪਰ ਇੱਕ ਲਘੂ ਫਿਲਮ ਵੀ ਬਣਾਈ ਗਈ। ਪਾਕਿਸਤਾਨ ਵਿੱਚ ਫੈਸਲਾਬਾਦ ਵਿਖੇ ਇੱਕ ਵੱਡੇ ਸਮਾਗਮ ਦੌਰਾਨ ਇਸ ਕਵਿਤਾ ਉੱਪਰ ਕੋਰੀਓਗ੍ਰਾਫੀ ਹੋਣੀ ਬਹੁਤ ਹੀ ਮਾਣ ਵਾਲੀ ਗੱਲ ਹੈ। ਜਿੱਥੇ ਚਾਹਲ ਕਲਮ ਦਾ ਧਨੀ ਹੈ ਉੱਥੇ ਮਾਲਕ ਨੇ ਉਸ ਨੂੰ ਬਲੁੰਦ ਆਵਾਜ਼ ਬਖਸ਼ੀ ਹੈ।  ਲਿਖਾਰੀ ਹੋਣ ਦੇ ਨਾਲ ਨਾਲ ਉਹ ਇੱਕ ਪ੍ਰਸਿੱਧ ਮੰਚ ਸੰਚਾਲਕ ਵੀ ਹੈ।  ਸਰਸ ਮੇਲਾ ਬਠਿੰਡਾ, ਵਿਰਾਸਤੀ ਮੇਲਾ ਬਠਿੰਡਾ, ਲੋਹੜੀ ਮੇਲਾ, ਫਲਾਵਰ ਸ਼ੋਅ ਅਤੇ ਪ੍ਰਸ਼ਾਸਨ ਵੱਲੋ ਕਰਵਾਏ ਜਾਂਦੇ ਵੱਡੇ ਸਮਾਗਮਾਂ ਦਾ ਮੰਚ ਸੰਚਾਲਨ ਜਸਵਿੰਦਰ ਚਾਹਲ ਕਰਦਾ ਹੈ ਅਤੇ ਆਪਣੀ ਸ਼ਾਇਰੋ ਸ਼ਾਇਰੀ ਨਾਲ ਸਰੋਤਿਆਂ ਨੂੰ ਕੀਲ ਲੈਂਦਾ ਹੈ। 22 ਮਾਰਚ 2020 ਨੂੰ ਮੋਗਾ ਵਿਖੇ ਹੋਣ ਵਾਲਾ ਸਤਿੰਦਰ ਸਰਤਾਜ ਦੇ ਸ਼ੋਅ ਦਾ ਸਟੇਜ ਸੰਚਾਲਨ ਜਸਵਿੰਦਰ ਚਾਹਲ ਨੇ ਹੀ ਕਰਨਾ ਸੀ ਜੋ ਕਿ ਕਰੋਨਾ ਦਾ ਵਜੵਾ ਕਾਰਨ ਰੱਦ ਹੋ ਗਿਆ ਸੀ। ਕੈਨੇਡਾ ਦੇ ਰੇਡਿਓ, ਅੈੱਫ.ਐੱਮ. ਰੇਡੀਓ ਬਠਿੰਡਾ, ਸਮੇਂ-ਸਮੇਂ ਤੇ ਚਾਹਲ ਨੂੰ ਲਾਇਵ ਕਰਦੇ ਰਹਿੰਦੇ ਹਨ। ਮੀਡੀਆ ਪੰਜਾਬ ਜਰਮਨ ਅਤੇ ਟਾਇਮ ਟੀਵੀ ਚੈਨਲ ਵੀ ਚਾਹਲ ਨੂੰ ਲਾਇਵ ਕਰ ਚੁੱਕੇ ਹਨ।  ਜਸਵਿੰਦਰ ਚਾਹਲ ਦਾ ਆਪਣਾ ਯੂ ਟਿਊਬ ਚੈਨਲ ਮਰਦਮਸ਼ੁਮਾਰੀ ਵੀ ਹੈ ਜਿੱਥੇ ਤੁਸੀਂ ਚਾਹਲ ਦੇ ਸਟੇਜ ਲਾਇਵ ਦੇਖ ਸਕਦੇ ਹੋ। ਜਸਵਿੰਦਰ ਚਾਹਲ ਆਪਣਾ ਇੱਕ ਕਾਵਿ ਸੰਗ੍ਰਹਿ ‘ ਇੱਕ ਮਰਦਮਸ਼ੁਮਾਰੀ ਇਹ ਵੀ’ ਆਪਣੇ ਪਾਠਕਾਂ ਦੀ ਝੋਲੀ ਪਾ ਚੁੱਕਾ ਹੈ। ਜਿਸ ਨੂੰ ਬਹੁਤ ਜ਼ਿਆਦਾ ਮੋਹ ਪਿਆਰ ਮਿਲਿਆ ਹੈ।  ਸੋਸ਼ਲ ਮੀਡੀਆ ਉਪਰ ਜਸਵਿੰਦਰ ਚਾਹਲ ਦੀ ਹਰ ਰਚਨਾ ਨੂੰ ਉਸ ਦੇ ਚਾਹੁਣ ਵਾਲਿਆਂ ਨੇ  ਰੱਜਵਾਂ ਮੋਹ ਪਿਆਰ ਅਤੇ ਮਾਣ ਬਖ਼ਸ਼ਿਆ ਹੈ। ਚਾਹਲ ਬਹੁਤ ਸਾਰੀਆਂ ਸੱਭਿਆਚਾਰਕ ਅਤੇ ਸਮਾਜ ਸੇਵੀ ਸੰਸਥਾਵਾਂ ਨਾਲ ਜੁੜਿਆ ਹੋਇਆ ਹੈ। ਜਸਵਿੰਦਰ ਚਾਹਲ ਨੂੰ ਬਹੁਤ ਸਾਰੀਆਂ ਸੰਸਥਾਵਾਂ ਵੱਲੋਂ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ। ਗੁਰੂ ਨਾਨਕ ਪਬਲਿਕ ਸਕੂਲ ਸੀਹਾਂਦੋਦ (ਲੁਧਿਆਣਾ) ਵੱਲੋਂ ਵਧੀਆ ਲਿਖਾਰੀ ਦਾ ਅੈਵਾਰਡ, ਸਰਵਹਿੱਤਕਾਰੀ ਸਕੂਲ ਮਲੇਰਕੋਟਲਾ ਵੱਲੋਂ ਸੋਹਣੀ ਕਲਮ ਅੈਵਾਰਡ, ਲੋਹਮਣੀ ਅਦਾਰੇ ਵੱਲੋਂ ਅੰਤਰਰਾਸ਼ਟਰੀ ਲੇਖਕ ਮੰਚ ਤਹਿਤ ਪ੍ਰਸਿੱਧ ਨਾਵਲਕਾਰ ਜਸਵੰਤ ਕੰਵਲ ਜੀ ਹੱਥੋਂ ਸਨਮਾਨ, ਪੰਜਾਬੀ ਵਰਲਡ ਫਾਊਂਡੇਸ਼ਨ ਵੱਲੋਂ ਸੋਹਣੀ ਕਲਮ ਐਵਾਰਡ, ਯੂਥ ਸੇਵਾਵਾਂ ਵਿਭਾਗ ਪੰਜਾਬ ਸਰਕਾਰ ਵੱਲੋਂ ਯੂਥ ਫੈਸਟੀਵਲ  ਦੌਰਾਨ ਬੈਸਟ ਮੰਚ ਸੰਚਾਲਕ ਦਾ ਐਵਾਰਡ, ਸ਼ਹੀਦ ਸੁਖਦੇਵ ਦੇ ਜਨਮ ਦਿਵਸ ਮੌਕੇ ਰਾਜ ਪੱਧਰੀ ਸਮਾਗਮ ਵਿੱਚ ਸੋਹਣੀ ਕਲਮ ਬੁਲੰਦ ਆਵਾਜ਼ ਐਵਾਰਡ ਨਾਲ ਸਨਮਾਨਿਤ, ਭਾਰਤ ਸਰਕਾਰ ਵੱਲੋਂ ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਤਹਿਤ ਬਠਿੰਡਾ ਵਿਖੇ ਸਰਸ ਮੇਲੇ ਵਿੱਚ ਵਿਭਾਗ ਵੱਲੋਂ ਲਗਾਤਾਰ 10 ਦਿਨ ਮੰਚ ਸੰਚਾਲਨ ਕੀਤਾ, ‘ਸਟੇਜ ਦਾ ਬਾਦਸ਼ਾਹ’ ਐਵਾਰਡ ਨਾਲ ਸਨਮਾਨ,। ਪੰਜਾਬ ਆਰਟ ਐਂਡ ਕੌਂਸਲ ਚੰਡੀਗੜ੍ਹ ਵੱਲੋ ਤੀਆਂ ਦੇ ਸੰਬੰਧ ਵਿੱਚ ਕਰਵਾਏ ਗਏ ਪ੍ਰੋਗਰਾਮ ਵਿੱਚ ਮੰਚ ਸੰਚਾਲਨ ਕੀਤਾ ਅਤੇ ਪੰਜਾਬ ਦੀ ਸਿਰਮੌਰ ਮੰਚ ਸੰਚਾਲਿਕਾ ਸਤਿੰਦਰ ਸੱਤੀ ਹੱਥੋਂ ਸਨਮਾਨਿਤ ਕੀਤਾ ਗਿਆ। ਵਿਭਾਗ ਵੱਲੋਂ 26ਜਨਵਰੀ 15ਅਗਸਤ ਅਤੇ ਵਿਭਾਗ ਦੇ ਹੋਰ ਪ੍ਰੋਗਰਾਮਾਂ ਵਿੱਚ ਮੰਚ ਸੰਚਾਲਨ ਦੀ ਡਿਊਟੀ ਜਸਵਿੰਦਰ ਚਾਹਲ ਦੀ ਹੀ ਲਗਾਈ ਜਾਂਦੀ ਹੈ। ਬੈਸਟ ਅਧਿਆਪਕ ਦਾ ਐਵਾਰਡ ਵੀ ਚਾਹਲ ਦੀ ਝੋਲੀ ਪਿਆ ਹੈ। ਜਸਵਿੰਦਰ ਚਾਹਲ ਕਲਮ ਦਾ ਧਨੀ, ਬਲੁੰਦ ਆਵਾਜ਼ ਦਾ ਮਾਲਕ ਹੋਣ ਦੇ ਨਾਲ ਨਾਲ ਮੋਹ ਪਿਆਰ ਭਰਿਆ ਨਿੱਘੇ ਸੁਭਾਅ ਦਾ ਮਾਲਕ ਹੈ। ਜਸਵਿੰਦਰ ਚਾਹਲ ਆਪਣੀ ਹਮਸਫ਼ਰ ਸਿੰਬਲਜੀਤ ਕੌਰ,ਪੁੱਤਰ ਸਤਿੰਦਰਜੀਤ ਸਿੰਘ ਅਤੇ ਆਪਣੇ ਮਾਤਾ-ਪਿਤਾ ਨਾਲ ਆਪਣੇ ਪਿੰਡ ਵਿਖੇ ਆਪਣੀ ਜ਼ਿੰਦਗੀ ਖੁਸ਼ੀ ਨਾਲ ਬਸਰ ਕਰ ਰਿਹਾ ਹੈ। ਦੁਆ ਕਰਦੇ ਹਾਂ ਪ੍ਰਮਾਤਮਾ ਅੱਗੇ ਕਿ ਚਾਹਲ ਦੀ ਕਲਮ ਦੀ ਨੋਕ ਹੇਠ ਇਸੇ ਤਰ੍ਹਾਂ ਸ਼ਬਦ ਨੱਚਦੇ ਰਹਿਣ ਅਤੇ ਸਟੇਜ ਦਾ  ਇਹ ਬਾਦਸ਼ਾਹ ਇਸੇ ਤਰ੍ਹਾਂ ਆਪਣੀ ਸ਼ਾਇਰੋ ਸ਼ਾਇਰੀ ਨਾਲ ਆਪਣੇ ਸਰੋਤਿਆਂ ਨੂੰ ਕੀਲਦਾ ਰਹੇ……..

———————————————————————————–